نظام التعليم المفتوح نظام اصبح منتشرا جدا بهدف الحصول على مؤهل عالى
نظام الهدف منه اعطاء فرصه لاصحاب المؤهلات المتوسطه او التى لم تسعفهم الحياه بالحصول على القسط الذى يرغبون ف التعليم
ليشبعوا رغبتهم فى المعرفه
لحد هنا والكلام جميل وعنب خالص
بس كان من اهم شروط التعليم المفتوح ان يكون مر خمس سنوات على تاريخ الحصول على المؤهل الاول
سواء كان ثانويه عامه او دبلوم او اى حاجه من شهاداتنا العظيمه فمصر
لكن السيد وزير التعليم العالى حفظه الله وسدد لطريق الخير خطاه
افتكس افتكاسه جديده
اصدر قرار غريب جدا
قال ايه خريج الثانويه العامه والازهريه والدبلومات دفعة السنه دى يقدر يدخل تعليم مفتوح عادى
يعنى يبقى العيل طلعان ميتين اهله فى الثانويه العامه علشان يدخل كليه وبعد ما يدخلها التنسيق الداخلى للكليه يذل اهله كلهم
وميدخلوش الشعبه الى هو عايزها
بس فى نفس الوقت الطالب الى جاب 50% يدخل تعليم مفتوح والقسم الى هو عايزه علشان دفع 1700 جنيه
طيب انا مجنونه وانتوا عاقلين
ايه الى يتعب العيل ويقعد يذاكر وياخد فى دروس يخرب بيها بيت اهله
طيب ما يوفر فلوس الدروس ويدخلبها اجعس كليه فى التعليم المفتوح
والحقيقه وعلشان منظلمش السيد الوزير هو مطبقش الكلام ده على كل المحافظات هو طبقه على اربع جامعات
منها جامعة المنيا وتحديدا كلية الاداب قسم الاعلام
الى بياخد فى التنسيق الداخلى للكليه 80% من مجموع اللغات
يعنى يبقى الطالب داخل الاداب من التنسيق بس ملوش حق فى قسم الاعلام علشان مجموعه قليل فى اللغات بس زميله الى مجبش مجموع فاى حاجه يدخل القسم ويدب صوابعه فعين التخين علشان سدد الرسوم بيشترى الشهاده بفلوسه
واخيرا احب اهنى الاستاذ الى سمى العمليه دى تعليم مفتوح
بس هو فى سؤال التعليم بتاع مصر مفتوح لحد فين!
احسن الدنيا حر خالص ومش هنقبل باقل من تعليم فوق الركبه
Falling hearts Here
هناك 25 تعليقًا:
اوه هو ده بقى الجديد بتاع كل يوم في مصر
كويس اننا لسه فالحين في حاجه حتى وان كانت مدمرة
اهو المهم ناجحين وخلاص وبشيرة صفر الالومبياد كمان
ياااااااااااااارب سترك
هو مفتوح لحد الامعاء كدا
وعلشان الواحد مش ناقص ضغطه يوطى اكتر من كدا
انظرى حولك لاى حاجه فى بلدك الحبيب وشوفى ايه اللى مش ممكن تشتريه فيها بفلوسك
ده النفوس البشرية بتشتريها يا مشمشه
كل سنة وانتى طيبة
اللي بيحصل ده على فكرة عادي جدا وشيء مش غريب والسبب بمنتهى البساطة ان اللي تعب وذاكر بيطلع من الكلية حمار ومش فاهم حاجة ومش فاكر حاجة من اللي درسها ونفس الحكاية للي بيتعلم تعليم مفتوح
التعليم اصبح مجرد مرحلة بنضيع فيها عمرنا وبنضيع فيها كمان فلوس علشان نخرج للمجهول
الحكومة بتحب الاستثمار وده خلاها تستثمر حتى في تعليمنا ومستقبلنا
كمان 20 سنة مصر كلها هيبقى معاها شهادات ومحدش عارف يكتب اسمه حتى
تحياتي
هههههههههههه
احنا في عصر الانفتاح
مفيش حاجة غريبة يعني
انا بصراحة اول مرة اسمع لقرار دا بس عموما كلها مؤشرات بالغاء الجامعات الحكومية ومجانية التعليم يعني هيتحول التعليم كله لتعليم استثماري
بس بجد بجد بأحييكي علي اختيار عنوان الموضوع
ياريتها جت ع التعليم المفتوح وبس
لا ده بقى فيه تعليم مفتوح وتعليم موازى وكليات خاصة وساعات معتمدة .. حاجة تقرف بجد
لكن اذا كان النظام اساسا ادمن العشوائية واصبحت هى سياسته ومنهاجة .. فلا تعليم هاينفع ولا صحة ولا فن ولا رياضة
وحسبى الله ونعم الكويل
الاكتاب اصبح له معنى معاكى
يا بنتى هو جت على التعليم المفتوح ما هى خربانه خربانه ؟
صاحب المضيفه
فالحين فى ايه
هو ده فلاح
دى قلة ادب
لما يخلى الشهاده بتتباع على الرصيف
يبقى ده تعليم
desertcat
على رايك اذا كان الانسان فى بلدنا ملوش تمن هنزعل على حتة ورقه
وانتى طيبه
انا حر
والله انا كنت مكتئبه شويه بس بعد كلامك
الحمد لله
انا مكتئبه كتييييييييييير
سنوايت
هو كل حاجه اتفتحت فى البلد دى خلاص
والخرم عمال يوسع
abu shahin
رياضه ؟
صحه؟
تعليم؟
هه
هو الاستاذ مصرى
منور
صوت من مصر
بالظبط
ايه رايك نعمل انا وانت مسلسل للاكتئاب وجوه اخرى
شيماء
الصديقة الجميله
كل سنة وانت طيبة
التعليم المفتوح ومشاكله واننا ممكن ناخد شهاده عاليع علي شان احنا معانا فلوس يعني العلم بقي للشراء والبيع وفعلا ده بقي موجود وللأسف موجود من فترة بعيده بس خلينا نبص لحاجه تانيه
وهى التعليم الاساسي والخزعبلات اللي حصلت فيه اقصد طبعا بالخزعبلات التطوير اللي كل وزير تعليم جه يعمله علشان التعليم يبوظ اكتر وبفضلهم بقي يخرج مجموعه كل سنه من اللي بيتقال عليهم دول زي طور الله في برسيمة اللي معاه فلوس يروح التعليم المفتوح ويشتري شهاده واللي معهوش بيقعد على القهوة ويفضل يشتم في البلد او يفكر يسافر شرم ولا الغردقة يمكن يعرفة واحده اجنبية تسفرة يعمله قرشين
انت عارفة يا شيماء
احنا محتاجين رقابة بما يرضي الله وقبل كل ده من عمل منكم عمل فل يتقنة
احنا كدا بنغرق كل يوم حتة لحد ما يجي الوقت اللي نبقي فيه متخلفين مليون بالميه
سياسة وفكر هدفة هدم الهوية العربية وبالاخص المصرين لأنهم افضل العقول العربية ودة مش كلامي الحضارة القديمة والعصور الحديثة والصناعة والتعليم اللي سبقنا بيه الدول العربية اللي حولينا سبب لأن مصر لازم تفضل في ضغوط اقتصادية وتعليمة علشان تظهر اجيال متعرفشي الالف من كوز البطاطا
موضوع التعليم ده لو قعد اتكلم فيه هزهقك ومش هخلص انهارده
بس اخر حاجتين هختم بيهم
التعليم حلقة من ضمن حلقات كتير هدف ناس كتير كسرها لكن ان اشاء الله هنطور للأحسن
الحاجه التانية انك غيبتي فترة طويلة ولما علقتى عندي علقتى تعليق مختلف في عمقة زي ما عودتيني منك
تقبلي مروري
سيد سعد
أنا بس حكمل فصيدة نفذت فيكى جريمتى من وجهة نظر القاتل الأجير وبالشعر الحر غير المقفى ولا المسجوع
بعد البيت الأخير اللى بيقول :
وظننت والسكين يلمع فى يدى ...أنى انتصرت ....أقول مكملا :
لكننى عرفت ..لما طعنت
أن المطوه السوسته لم تفتح كويس
وظل نصلها اللميع مدفونا داخل المفبض
واتارى اللى كان عمال بيلمع كان الموبايل
وكانت طعناتى كلها بالخشب
فكيف تموت امرأة طعنت بالخشب
فى المره القادمه سأجيب سكينا كبيرا
ويكون حته واحده وليس سوسته
وسأنشن عليكى حبيبتى من بعيد
تماما كما يفعل أبطال السيرك العالمى
موش حاسيبك مهما زوغتى
وان فلتى منى عشر مرات بجلدك
الحداشر تابته والسكينه أهىا
التعليم أصبح تجارة وشطاره الا ترين كمية الجامعات والأكاديميات الخاصة ..فطن رجال الأعمال لذلك فى اسكندريه رجل أعمال شديد قفل نشاطه الصناعى تقريبا.. ومدرسه -فمعهد -فجامعه..لأنه شاف ان العائد اعلى من الصناعه ووجع القلب ..الكل عاوز ورقه تقول انه تعلم ...طبعا الوزاره شافت كده قالت تخش بنفر فى جمعية كل واشكر ..ومن ناحيه تانيه اللى جاى من التلامزه أكتر من اللى موجود من تخت
فاديها فى الطراوه تديك فلوس ..وأبجنى تجدنى
العزيز سيد سعد
انا سعيده جدا بمرورك وتواصلك
انت فنان بكل ما تحمله الكلمه من معانى ظاهره ماديه ومعنويه
اعذرنى اذا كنت قد قصرت فى زيارتك او فقدت تركيزى لبوستك الاخير رغم ان رقة احساساك تخطف الالباب
اما عن رايك فى اننا افضل العقول العربيه
فانا معك كنا بالفعل ولكن ذهب ذلك عنا بفعل الجوع والفقر والمرض وسياسة الذل والقمع
خالص تحياتى
maxbeta3zaman
ايييييييييييييييييييه
عظمه على عظمه ياريس
بس دى غلطتك من الاول
مطواه سوسته ياراجل
وبتطعن الموبايل فى الاخر
كويس ان نزار مات قبل ما يسمعك
التعليم المفتوح مفتوح الى ان يتهد حيل الطلبة واللى بيدفعوا للطلبة
والدولة تاخد كل مليم يكون مع الناس
تحياتى لك
هى جت على التعليم يعنى
كل يوم بياكدوا ان فكرة التعليم فى مصر فكرة فاشلة
تحياتى
وهي دي مصر يا عبلة
تانى يا شيماء؟؟
انا مش قولتلك تبطلى جهل بقى
وتسايرى العصر والموضه؟؟
لسه فاضل التعليم الكات
والتعليم النص كم
والتعليم اللى بفتحه على الجنب
واحدث صيحه بقى هى التعليم ابو حمالات
نهر الحب
تقدر تقول انه حلقه من سلسلة استنزاف اموال المصريين حتى اخر قطره
لحظة تامل
التعليم فكره فاشله
والنعمه حاولت اقنع ابويا يوفر فلوسه مرضيش
ادم المصرى
تصدق بقى اهى عبله دى كانت ذكيه جدا
صافى
حبيبة قلب اختك
انا زعلانه منك
ازاى تنسى احدث صيحات التعليم
التعليم ابو كشكشه او كرانيش من على....
ملوش لازمه
انتى اكيد فهمتى
إرسال تعليق